Scontru cù Josepha Giacometti, Cunsigliera esecutiva di Corsica
U 15/09/2020
Scrittu da A redazzione

Issa simana, a squadra di u ghjurnalettu hà scuntratu à Josepha Giacometti, Cunsigliera esecutiva in carica di l’insignamentu secundariu, superiore è di a ricerca, di a furmazione prifessiunale, di l’azzione culturale, di u patrimoniu culturale è di l’audiuvisivu.

Filmettu :

Ghjurnalista  Pudeti fà una prisentazioni è dopu spiegà a vostra funzioni di cunsigliera esecutiva ?

Josepha Giacometti – Allora, sò cunsigliera esecutiva in carica di a cultura, di u patrimoniu, di l’educazione, è di a furmazione in l’Assemblea di Corsica chì piglia e decisione per e pulitiche publiche di a Corsica. Ci sò ghjente chì s’occupanu, ch’ella sia di furmazione, di turisimu, d’agricultura, hè u guvernu diceraghju, di a Corsica, è eiu m’incaricheghju di a cultura, di u patrimoniu, di l’educazione, è di a furmazione. Vale à dì chì m’occupu di a valurisazione di u patrimoniu di a Corsica, di l’azzioni culturali ind’è i musei, veramente di l’azzione di valurizazione di a cunniscenza di a nostra storia è di a nostra cultura è in quantu di l’educazione è di a furmazione, di e pulitiche educative chì sò messe in opere, dunque e pulitiche educative vale à dì, l’intrattenimentu è custruzzione di stabilimenti sculari, ma dinù l’insignamentu bislingu, o i piani di furmazione perchè si sà chì c’hè u travagliu di messa in piazza di u pianu di furmazione è a cartula di e furmazione è dunque, m’occupu di tuttu què per a Cullettività di Corsica. 

Ghjurnalista – Allora site in carica di l’educazione, di a furmazione, di a cultura, è di u patrimoniu, chì ni pinsate di u nostru Ghjurnalettu per i zitelli, in lingua corsa ? 

Josepha Giacometti – Per mè ghjè propriu una bona nutizia, è una bella iniziativa, perchè chì veramente c’hè issu bisognu di parlà di tuttu in lingua corsa, di prisentà à i nostri zitelli tutti i sughjetti, chì sò quelli di a Corsica ma pensu chì averete da fà sughjetti dinù aldilà di a Corsica, in lingua corsa. Vale à dì ch’ellu si pò parlà di tuttu à i più giovani, in lingua corsa è pensu veramente ch’ellu hè impurtantissimu perchè ch’ellu ci vole à tramandà issa lingua, à fà la entre in u cutidianu, in a vita cutidianu di i più giovani. È ch’ella ci fussi un arnese dinù ghjurnalisticu, chì sia addirizzatu à i nostri zitelli mi pari più ch’una bona nutizia perchè chì ci permette di tramandà a nostra lingua, di mustrà ch’ella pò parlà à tutti, ch’ella pò esse in bocca di tutti, in bocca à i più giovani, è chì noi dinù, ci pudemu tutti, attori micca solu pulitichi, attori publichi di a Corsica, persunalità cunisciute o scunisciute, chì ci pudemu addirizzà à i più giovani è chi puderete parlà li di tuttu in a so lingua. 

Seguitemi nantu à e rete !

Subscribe To Our Newsletter

Subscribe To Our Newsletter

Join our mailing list to receive the latest news and updates from our team.

You have Successfully Subscribed!

Abbunate vi à à nostra lettera d'informazione

Ricevite i nostri articuli tutti i ghjorni

 

Perfettu!