Emil Tamagna ci parla di u so mistieru di liutaiu
Scrittu da A redazzione
U 17/11/2020

Oghje si parla di u mistieru di liutaiu chì ghjè un vechju mistieru d’artisgianu. Chì face u liutaiu ind’è a so ghjurnata ? Quale sò e qualità bisugnevule per fà stu mistieru ?Emu dumandatu à Emil Tamagna chì ci hà apertu u so attelu in Cardu

– Pudete prisentà vi ?

Salute mi chjamu Emil Tamagna, aghju 61 anni è sò liutaiu in Cardu dipoi guasi 30 anni.

Chì si face ind’è u mistieru di liutaiu ?

– Allora u travagliu hè cumpostu di duie parte : a prima è a più impurtante per mè hè a riparazione di strumenti di musica. A seconda parte hè a fabbricazzione di strumenti. Tuttu stu travagliu si face sopratuttu incù u legnu chì hè u materiale principale di i strumenti di musica. U mistieru di liutaiu hè dunque un mistieru d’artisgianu induve si travaglia incù e mane. U scopu di u liutaiu hè di migliurà u sonu chì esce d’una ghitarra per esempiu o di rende la più bella. In Corsica, u travagliu si face sopratuttu incù viulini, alto, viuluncelli, cuntrabasse è ghitarre chì sò i strumenti i più aduprati qui.

– Perchè site diventatu liutaiu ?

– À l’iniziu sò musicante ma sò dinù passiunatu da u legnu è u so travagliu. Dipoi à mo ghjuventù aghju sempre in stacca un cultellu è un pezzu di legnu à intaglià. Ghjè appena a reunione di ste duie passione chì m’hà fattu diventà liutaiu. Aghju cuminciatu quandu era zitellone à mudificà e mo ghitarre per fà le sunà megliu. E pò à 18 anni aghju custruitu a mo prima ghitarra.

– Chì studi fà per esse liutaiu ?

– I studi ùn sò micca un’ubligazione ma hè megliu di fà una scola o di passà un BEP o un CAP di liuteria. Sera dopu più faciule d’avè un staziu ind’è un liutaiu prufessiunale per amparà megliu. Hè pussibule di furmà si solu perchè ùn hè micca un’ubligazione d’esse diplumatu per esercità è ghjè ciò ch’aghju fattu eiu.

– Chì sò i vantaghji di stu mistieru ?

– U più grande vantaghju è di vede u travagliu chì avanza incù u tempu è di pudè tuccà u risultatu dopu à ore è ore di lavoru. Incù a riparazione u liutaiu rende a vita à i strumenti per u più grande piacè di i pruprietari.

– È i svantaghji ?

– Ghjè un travagliu chì dumanda assai tempu. Per esempiu, eiu stò trà 50 è 60 ore per settimana ind’è u mo attellu ma ghjè tantu passiunante ch’eiu ùn vecu micca passà u tempu.

– Chì sò e qualità bisugnevule per esse liutaiu ?

– Prima, ci vole tene caru u travagliu di precizione è esse pazientosu. Ci vole esse passiunatu è dà u megliu di ciò chì tù poi dà per trasmette à u strumentu à qualità di u to travagliu. Ghjè appena cum’è in cucina, ùn basta micca à avè a sosula di i più grandi sceffi di cucina per esse dinù u più grande. Ci vole una sensibilità à trasmette.

– Chì vulete dì à i ghjovani chì si ponenu a questione di chì mistieru sceglie ?

 – Nanzu di vulè fà studi per esse liutaiu ci vole sapè s’ellu ti piace u travagliu di u legnu. Prova di sculpì un pezzu di legnu, tocca u materiale. Piglia una ghjambella fora è fa ti un arcu. S’ella ti piace allora vai puru à amparà stu mistieru maravigliosu ! Se tu voli fighjà u mo travagliu, poi andà annant’à u mo situ internet : https://emiltamagna.wixsite.com/luthier

 

 

  • Gmail
  • Facebook

Seguitemi nantu à e rete !

Subscribe To Our Newsletter

Subscribe To Our Newsletter

Join our mailing list to receive the latest news and updates from our team.

You have Successfully Subscribed!

Abbunate vi à à nostra lettera d'informazione

Ricevite i nostri articuli tutti i ghjorni

 

Perfettu!