Serà pussibule d’andà a vede i nostri anziani senza avè a peura di cuntaminà li da quì à pocu chì a campagna di vaccinazione contr’à u siscu hè principiata stu mercuri u 6 di ghjennaghju. S’ellu era aspettatu dipoi parechji mesi, u vaghjolu contr’à u Covid-19 hè ghjuntu attempu in Corsica per pudè cumincià l’annata 2021 incù appena di sperenza.
E prime vaccinazione sò state fatte in l’uspidale di Bastia stu mercuri è in l’EHPAD di Toga per l’anziani chì vivenu quallà. U scopu hè di prutege li contr’à u siscu perchè sò e persone chì sò u più in periculu. Una vaccinazione chì era aspettata cum’è u spiega Nadine Charnier, 72 anni è chì hè a prima residente d’EHPAD di Corsica vaccinata : « Spergu pudè esse più libera di sorte senza avè a peura di cuntaminà mi eo è l’altri anziani. Tuttu s’hè bè passatu, sò in piena forma, appaciata cum’è s’ellu era u vaghjolu per l’influenza ».
Un scaricu currispostu da l’altri residenti chì sò stati vaccinati è chì volenu ritruvà in furia una vita nurmale, fatta di mumenti di spartera incù i so figliulini.
