L’avete digià, di sicuru, vistu ind’è Mafiosa, Un prophète, Disparus o ancu Quadras… L’attore è cumediante aiaccinu, Jean-Philippe Ricci, hà u primu rollu ind’è “Aio Zitelli”, un filmettu cortu pre-selezziunatu per l’Uscari in Hollywood. Livia hè andata à incuntrà lu per voi. 

– Cumu hè a vostra relazione cù a Corsica ? 

– Sò arradicatu à a Corsica, a tengu cara cum’è a possu udià. Sò partutu à 15 anni perchè chì avia bisognu di passà a cunfina di u mare per pudè sprime mi. In verità, era parte per megliu turnà, per pudè avè sperienze nove. À 43 anni, aghju a voglia di turnà ci, hè una chjama naturale, turnà in casa soia, un ritornu ch’avemu tutti in corpu à noi. 

– Preferite u teatru o u sinemà ?

– I dui. Ùn aghju micca preferenza postu chì ste duie cose s’assumiglianu è si cumplettanu. U sinemà hè un castellu di carte chì si deve accunccià cù l’altri. À u teatru, ùn puderemu mai cappià l’energia cumuna ch’ellu si sente cù u spettatore. 

– Un rollu chì hà lasciatu una stampa ? 

– Mi piacenu tutti i rolli. Aghju sempre un piacè tamantu à travaglià li.

– Un rollu ch’ellu vi piaceria à ghjucà ?

– Mi piaceria à travaglià i rolli di donne. Perchè micca pensà à rolli cum’è quelli di Almodovar cù tenute di serata. Mi piaceria di ghjucà un rollu di transessuale. 

– Avete qualchì prugettu ?

A pezza di teatru Intra-muros serà prisentata à a fine di u mese di marzu in  Bastia è anderemu in giru per a pezza sin’à 2021.