L’invitata di a simana : Incontru cù Pecurina Nera, passiunata di muntagna è d’alpinismu
Scrittu da A redazzione
U 20/10/2021

Pecurina nera. Forse ùn cunniscite stu nome, ma s’è avete e rete suciale, forse si ! 

Pecurina nera, o, Delphine di u so nome, hè corsa. Una giuvanotta uriginaria di Luri, Capi Corsu è chì hè appassiunata di muntagna. Ambassatrice di a marca di vestiti Millet è d’un turismu à longu andà per u Capi corsu, a giuvanotta sparghje a so passione, tutte e so spassighjate, surtite spurtive è surtite tecniche d’alpinismu nantu à Instagram. 

Pudete seguità u so parcorsu è vede i so magnifichi ritratti nant’à u contu IG : pecurina

À Pecurina Nera, li hè sempre piaciuta a muntagna, da chjuca. Hà principiatu à spassighjà cù a so famiglia, à partesi da 2 anni. Hè u so babbu chì li hà trasmessu a so passione, è Pecurina Nera, era chjuccuta. Vulia fà « cum’è i maiò » è caminà da per ella senza esse purtata in bracce.

A pocu à pocu, a muntagna hè diventataa una passione tremenda, Delphine hà principiatu à attippà i primi monti di 3 000 metri à 6 anni ! Pecurina a dice à U Ghjurnalettu, hà sempre campatu per a natura, l’aria fine, a muntagna, u silenziu ch’ella ci trova è a libertà ! Un’armunia naturale chì l’hà sempre purtata à andà sempre più luntanu ! 

Tocc’à a sta figliola di u Capicorsu à sensibilizà ci : iè, a muntagna pò esse un locu di ghjocu per i zitelli è i ghjuvanotti ma ci vole à fà casu ! « Per e spassighjate in altitudine, quandu si face monti di 2000, 3000 metri ci vole à rispettà u ritimu di i zitelli. Sò elli à impone lu ! Ùn devenu perde fiatu. I maiò, devenu stà attenti à què. Iè a muntagna hè periculosa ma hè un’attività adatta à i zitelli s’ella hè fatta cum’ellu ci vole ». 

À Pecurina Nera, li piace à scappà à spessu in muntagna, a libertà, a pace ma sopratuttu, stu sintimu d’ammirazione ch’ella hà fighjendu a natura, eccu ciò chì li dà fiatu. Tene i so ricordi cum’è tesori : vede e muvre chì saltanu, accarezzà e marmotte, incuntrà i pastori cù e so bande di pecure, tuffà si sottu à u ghjacciu d’un lavu cutratu, è nutà in l’acque cristalline. 

Delphine a ci dice, ci vole à appruntà e so surtite. Travaglia nantu à e carte IGN, fighjà i camini, e distanze prima di parte. Percorre 30 chilometri sola è 2000 metri di slivellatu. Ma quandu ci vole appena di più di tecnica, chjama una guida, ùn prova micca da per ella. « Ci vole à cunnosce e so limite è e regule di securità. » 

Pocu tempu fà, a spurtiva hà fattu duie corse d’alpinismu difficile : u spicu « Kuffner du Mont Maudit » à 4465 metri è a traversata di a « Meije » 3984 metri. Sò stata accumpagnata da una guida di muntagna, Charles Noirot.

I so prugetti per 2022 : fà u « Mont Blanc » in una ghjurnata sola è micca duie, cum’ella si face di solitu. Corre a corsa di « l’Odlo trail » chì face 70 chilometri. 

Una sfida nova per Delphine, a nostra Pecurina Corsa.

Seguitemi nantu à e rete !

Subscribe To Our Newsletter

Subscribe To Our Newsletter

Join our mailing list to receive the latest news and updates from our team.

You have Successfully Subscribed!

Abbunate vi à à nostra lettera d'informazione

Ricevite i nostri articuli tutti i ghjorni

 

Perfettu!