Pè cunnosce a storia di thanksgiving, ci vule à turnà à i seculi di e culunie, quandu I Stati Uniti eranu inglesi. 

Sbarcanu, in u 1620, nantu à a terra di u Mondu Novu, u Massachusetts d’avà,102 persone chì venianu d’Inghilterra. 

Sti culoni, chì seranu per a storia “i babbi pellegrini di u Mayflower” ( stu nome vene da u nome di u battellu chì li hà purtati sin’à quallà), avianu francatu u mare per creà sta cità nova, chjamata Plymouth cum’è u so locu d’urigine, induve anu pussutu prusperà è praticà a so religione integrista (eranu cristiani puritani). 

Ghjunti in America, nantu à stu territoriu inuspitalieru, resu sempre più duru, per via d’un inguernu assi fretu, fù una prova tamanta per a nova cumunità chì ebbe assai pardite. 

I culoni sarianu morti senza l’interventu di l’Indiani d’America, chì mustronu à i scalaticci cumu cultivà a terra, è l’animali mansi da tene per pudè campà. 

L’annu dopu, l’Indiani è i Babbi pellegrini festighjonu inseme a cugliera bona bona cù un ripastu maiò per ringrazià u Signore di tanta divizia. Di sta festa in u 1621, hè natu u ghjornu di u Ringraziamentu, chì dapoi u 1863 hè diventatu a festa annuale naziunale in America.