L’invitatu di a simana : Fabien Landron
Scrittu da A redazzione
U 13/10/2021

Oghje, U Ghjurnalettu hè andatu à scuntrà à Fabien Landron chì campa in Purtivechju è chì hè maestru di cunferenze à l’Università di Corsica. Fabien hà fattu di a so passione, u so travagliu. 

Scemu d’Italia, di a lingua è a so cultura, Fabien dà corsi in lea cù ste tematiche à i  studienti di l’Università di Corti. Mai saziu di prugetti, Fabien Landron s’impegna dinù in mondu culturale corsu è u festivale di u filmu talianu d’Aiacciu chì si face ogni annu. Permette cusì à l’aiaccini, maiò, sculari è zitelli di scopre ghjuvelli muderni di u sinemà talianu. 

Incontru cù un omu chì hà centu vite è s’impegna à parechji livelli. 

  • Poi prisentà ti ?  
  • – Salute, mi chjamu Fabien Landron. Sò maestru di cunferenze di lingua è cultura taliana à l’Università di Corsica, vole dì chì sò insegnante ma dinù cercatore. 

Insegnu a lingua è a cultura taliana à studienti in talianu è studienti in lingua straniera specifica è sò rispunsevule pedagogicu di a licenza è u master di sta filiera (LEA in francese). Cum’è l’aghju detta, sò dinù cercatore, facciu ricerca nantu à e scienze umane in parechji settori precisi. A mo attività di ricerca cuncerna u sinemà talianu cuntempuraneu (attori, realizatori, tematiche) da l’anni 2000 sin’à oghje. Mi piacenu e serie taliane è travagliu dinù nantu à stu generu d’opere. 

– D’induve vene sta passione di l’italia ? 

Sta passione di l’Italia vene da u liceu. Avia un prufessore di talianu, chjamatu Jacques Profizi chì m’hà datu a curiosità è a voglia di sta lingua è sta cultura. Dopu à un viaghju in Umbria, à Pasignano sul Trasimeno quandu era in classa di seconda, aghju avutu a voglia tremenda di travaglià nant’à l’Italia. Mi sò sempre piaciute e lingue straniere ma aghju capitu chì u mo parcorsu seria in lea cù l’Italia. 

 Per u sinemà talianu hè un’altru prufessore chì si chjama Viviana Gottardi, chì era prufessore di sinemà audiuvisivu chì m’hà datu sta voglia di sapè ne di più nantu à u sinemà talianu cum’è un testimoniu di a nostra sucetà. E i mo viaghji à i festivali dedicati à u sinemà talianu, cum’è quellu d’Annecy chì hè u festivale di u filmu talianu u più famosu in Francia, hà finitu d’arrecà mi sta passione.

– Ci poi parlà di u festivale di u filmu talianu in Aiacciu ?

Allora u festivale hè statu creatu anni fà in Aiacciu da u tintu di Serge Leca. U scopu era di fà scopre filmi taliani à l’aiaccini. 

U festivale hè pocu à pocu cresciutu sin’à diventà un eventu impurtantissimu, aspettatu ogni annu da u publicu aiaccinu. Dura avà una simana sana è hè dedicatu à e produzioni sinematographiche taliane. A so Presidente hè a figliola di Serge Leca, Agnès Leca.

 Eiu mi ci sò interessatu è prima era un prufessore chì purtava i so studienti à vede i filmi. Pocu à pocu, mi sò impegnat. Facciu avà parte di a squadra : circhemu i filmi à prisentà, mettimu i sottu-tituli, mettimu in ballu a cumpetizione, accuglimu a ghjente, discutemu cù i spettatori. 

– Di modu cuncretu cumu funzionneghja ? 

U festivale dura 10 ghjorni, sceglimu 10 filmi, surtiti solu in italia, certi sò ancu esclusivi. Picculi filmi o filmi cù un successu tremendu. Stu travagliu dumanda un annu sanu per appruntà u festivale di l’annu dopu, perchè chì vedimu parechji parechji filmi per pudè sceglie li.  Quist’annu u festivale serà da u 6 à u 14 di nuvembre.  Hè difficiule per noi di truvà filmi adatti à i zitelli o zitellucci ma mettimu quantunque filmi per i sculari. Di fatti, sculari di scola materna, secundaria s’affaccanu cù i so maestri da u circondu aiaccinu per scopre u sinemà talianu. Ogni annu ch’è almenu dui filmi scelti à puntu per i sculari è ghjuvanotti. 

– Chì ghjè chì ti piace u più in u to travagliu ? 

Aghju a scenza tamanta di fà u travagliu d’insegnante circatore è di travaglià nantu à a mo passione, cio chì mi piace in a vita di tutti i ghjorni è mi piace à pruvà à trasmette a mo passione à i studienti. Hè cum’è una missione per mè. Custruisce un ponte trà a Corsica, è u Mediterraniu è sta terraferma quasì naturale chì hè l’italia. 

Sò sempre mossu da prugetti è voglie diverse. Vogliu cuntinuà à travaglià nant’à l’italianità in Corsica per via di i corsi chì docu à l’Università, a sparghjera di u mo sapè, a ricerca o u mo impegnu inde u campu culturale. 

Aghju dinù parechji prughjetti cù l’Università. 

Seguitemi nantu à e rete !

Subscribe To Our Newsletter

Subscribe To Our Newsletter

Join our mailing list to receive the latest news and updates from our team.

You have Successfully Subscribed!

Abbunate vi à à nostra lettera d'informazione

Ricevite i nostri articuli tutti i ghjorni

 

Perfettu!