A squadra di u Ghjurnalettu hà incontratu sta simana Mathias Enard, chì era in Bastia. Enard, hè un autore famosu, chì hà vintu u premiu Goncourt 2015 per u so libru Boussole.
– Perchè a scrittura ?
– A voglia di scrive vene di a lettura. Aghju sempre lettu assai assai. Quandu era zitellu, lighjia tantu, i libri eranu a mo passione. I libri è bella sicura, tuttu ciò chì era nascostu daretu, i viaghji, u luntanu. Allora aghju sviluppatu una passione per a scrittura, ma dinù per i viaghji.
– Quale sò l’autori chì v’anu datu l’estru per a scrittura ?
– Avia una passione, ch’aghju sempre, per Blaise Cendrars. Forse perchè chì era dinù pueta è rumanzieru ; forse dinù perchè chì ripresentava u viaghju, ma dinù tutta a storia di u 20esimu seculu, da a guerra di u 14 sin’à quella di u 39. Era un’autore di u 20esimu seculu. Avia una lingua per tutti, è efficace, assai puetica à u listessu tempu.
– Ci sò ind’è i vostri rumanzi, assai persunaghji sfarenti…
– Per mè, hè assai difficiule di scrive un rumanzu senza persunaghji, persunaghji assai diversi, assai impurtanti. Ci vole à custruisce parechji persunaghji per fabbricà un rumanzu.
– Si viaghjia tantu dinù…
– Mettu in ballu assai persunaghji chì viaghjanu, ancu s’è certe volte si tratta di viaghji pochi esotici. Ind’è u mo ultimu libru, l’azzione si face ind’è u dipartimenti di i Deux-Sèvres. Ma hè quantunque un viaghju perchè chì a ghjente si move sempre.
– C’hè stata un’evoluzione di a vostra scrittura dapoi u principiu ?
– Iè, a mi pensu. Ci vuleria à dumandà à i lettori. Ma bella sicura, ùn si scrive listessu à 30 anni è à 50 anni. Quandu rivecu i mo primi testi, chjodu u libru in furia, appena vergugnosu.
– Avete d’altri libri in mente ?
– Aghju sempre parechji prugetti. Mentre u mo viaggiu in Corsica, per stu festivale, sò andatu à spassighjà ind’è L’agriate, vicinu à Saint Florent. Mi sò ancu ciuttatu in mare. In a mo mente, pensavu à un prussimu libru, a storia puderia parte di stu locu quì. Un vogliu dì nunda per avà, un rumanzu hà bisognu d’assai assai tempu per sbuccià.
