U karateka Guillaume Le Van hà incontrata a squatra di U Ghjurnalettu
Scrittu da A redazzione
U 11/11/2020

Oghje u ghjurnalettu hè andatu à incuntrà à Guillaume Le Van, un ghjovanu bastiacciu praticante di Karate chì hà fattu parechje cumpetizione.

– Dipoi quandu praticate u Karate ?

– Aghju principiatu in u 1999, avia 5 anni è avà à 26 anni cuntinueghju sempre.

– Perchè avete sceltu sta praticà ?

– À l’iniziu ùn aviu tantu a scelta chì u mo babbu era prufessore di Karate (risate). Ma pocu à pocu ghjè una praticà ch’aghju amparatu à tene caru è ghjè sempre u casu avà. M’hà sempre piaciutu di cumbatte è u karate hè una praticà induve si pò dà calci è cazzotti senza mai ferì l’aversariu. Ghjè una praticà d’incontru iè ma sopratuttu di rispettu. S’ampara a difende si è à cunnosce si, vole dì sapè ciò chì m’impaurisce è perchè ma dinù di ciò ch’eo sò capace, o nò di fà. Di più u karate hè natu annant’à Okinawa, à u Japone, chì ghjè cum’è a Corsica un’isula. Pensu dinù chì e valore di i praticanti di karate sò vicine di e valore di rispettu di i corsi.

– Chì ghjè u vostru più bellu titulu di campione ?

– Sò statu vincidore di a ghjustra internaziunale di Turin, in Italia in u 2017. Ghjera una bella vittoria perchè aghju scunfittu d’altri spurtivi avvezzi à e ghjustre internaziunale. Ma stu titulu ùn seria mai ghjuntu senza i mo genitori chì m’anu sempre allaziatu à travaglià per esse più forte è per quessa i vogliu ringrazià.

– Quale sò i vostri esempi di karate ?

– Alexandre Biamonti. Hè statu 4 volte campione di u mondu, 9 volte campione d’auropa è hè cunsideratu cum’è una legenda di u karate francese ricunnisciutu ind’è u mondu sanu. Aghju a furtuna di fà un addestramentu una volta per mese quand’ellu ghjunghje in Corsica per à a lega corsa di karate.

– Cumu hè a vostra relazione incù a Corsica.

– Hè prufonda. Ùn sò mai partutu di a Corsica, solu per e vacanze. Sò dinù un militante di a lingua è di a cultura corsa. Facciu un prugettu di karate bislingu corsu-japunese.

– Fate parechje cose ! Cumu fate per truvà u tempu ?

– Ghjè difficiule ma incù un’urganizazione bona è a passione hè pussibile. L’urganisazione ghjè rispettà un spartitempu, cum’è i zitelli à a scola.

 

Seguitemi nantu à e rete !

Subscribe To Our Newsletter

Subscribe To Our Newsletter

Join our mailing list to receive the latest news and updates from our team.

You have Successfully Subscribed!

Abbunate vi à à nostra lettera d'informazione

Ricevite i nostri articuli tutti i ghjorni

 

Perfettu!