Caleb King hè un ghjovanu studiente americanu in seconda annata di medicina. In America l’università costa assai caru è ci vole avè i soldi per pudè studià. Per pudè finanzà i so studi, u ghjovanu americanu hà vindutu carte Pokémon scarse. Cumprate in u 2016 per 4 000 dollars sò state vindute da u studiente per 80 000 dollars ! Una bella uperazione chì permetterà di cuntinuà i so studi di medicina.

Ma Caleb King pussede d’altri tesori ind’è a so stanza. L’americanu hà spiegatu à u media Fox 5 Atlanta ch’ellu hà cunservatu torna 21 carte scarse stimate per 50 000 dollars. Framezu sti tesori ci hè a prima edizione d’una carta di Pikachu incù e guance rosse. Sta carta era digià stata vinduta in u mondu per 20 000 dollars.

Serebbe una bella idea di sbullicà ind’è i vechji ghjoculi di i to genitori nò ? Puderai truvà un tesoru !