Per parà a sparghjera di i « fake new anti-vax », TikTok hà annunciatu a so strategia nova per mette in piazza misure per luttà di pettu à e « fake news » di u varghjolu. Mentre u guvernu, dice à ogni stonda « testà, alertà, prutegge », annantu à TikTok l’altru credu chì gira hè « infurmazione, muderazione, suppressione. »

Ind’è un cumunicatu di stampa di u 15 di dicembre, a rete suciale chinese hà annunciatu « a creazione d’un centru d’infurmazione nantu à i varghjoli. » Hà da marchjà nantu à u listessu mudellu cà u spazziu messu in ballu di ferraghju 2020 per avè infurmazioni annantu à u viru. Ci sò filmetti ufficiali cum’è quelli di l’OMS ma dinù di persone famose annantu à internet cum’è Hugo Décrypte. TikTok annunzia dinù a creazione d’un « tagu varghjolu » per truvà i filmetti chì parlanu di u varghjolu. Una bandera chì permette di truvà stu centru d’infurmazione serà messu nantu à ogni filmettu à parte di u 21 di dicembre. 

Infine, a piattaforma hà da rinfurzà u so travagliu di muderazione è hà da indurì e regule per pudè caccià l’informazioni falsi nantu à i varghjoli. 

Spechju di a sucetà, TikTok hè digià invasu da filmetti annantu à u varghjolu. Ci sò digià più di 700 milioni di viste.